"كان يا ما كان ..يا سعد يا اكرام ..ما يحلا الكلام الا بذكر النبى عليه الصلاه
والسلام..قول عليه الصلاه والسلام ..
كان فيه ولد امور وجميل اسمه برقوق..وكان متضايق اوى ان اسمه برقوق وكل
ما الناس تشوفه تقعد تتريق عليه وتقوله يا برقوق يا برقوق ..وهو كل يوم يرجع
يعيط لمامته ويقولها انتوا ليه سمتونى الاسم الغريب ده ..ومامته تقوله متزعلش
ده اسم فاكهه جميله يقولها لا ده اسم وحش والناس بتتريق عليا ..المهم وهو
ماشى فى الشارع سمع واحد بينده صاحبه وبيقوله يا جميل يا جميل ..وقف
وساله هو صاحبك ده اسمه جميل فعلا ..قالوا ايوه اسمه جميل ..فمشى وهو
بيقول ياه لو كان اسمى جميل زيه كده كانت الناس تحبنى وتبطل تتريق عليا
..وهو ماشى طلعله الجنى قاله ايه يا برقوق زعلان ليه ..قاله انا عاوز اسمى
يبقى جميل زى الولد ده ..الجنى قاله ماشى بس على شرط ..قاله اشرط يا
جنى ..قاله لو بقى اسمك جميل يبقى مصيرك هيبقى زى مصير جميل وحياتك
هتتبدل معاه ..قاله موافق ..الجنى نفخ فى ايده وقاله روح يا برقوق من هنا
ورايح انت جميل..فرح برقوق اوى وراح لمامته البيت عشان يقولها ..ملقاش لا
مامته ولا باباه..ولقى بدالهم ست عجوزه قالها انتى مين ؟ قالتله انا جده جميل
وانا مريضه وجميل هو اللى بيرعانى وبيشتغل بعد المدرسه وبيصرف عليا ..وانت
بقيت جميل يبقى هتعمل اللى كان جميل بيعمله ..برقوق اتضايق بس قال مش
مشكله ..المهم قرر يعمل زى جميل وراح مدرسته بقى وهو فرحان انه جميل
..خلص مدرسته وراح على الشغل ولقى نفسه شغال ميكانيكى والاسطى
بتاعه كل شويه يضربه ويقعد يتريق عليه ويقوله انت جميل انت ..ورجع من
الشغل وهو تعبان وهلكان وقعد ياكل جدته ويرعاها وفى النهايه دخل ينام وهو
متضايق اوى وقعد يقول وانا برقوق كانت حياتى حلوه وجميله وكان بابايا ومامتى
معايا ..دلوقتى هما فين ؟ وقعد يعيط فطلعله الجنى تانى وقاله ايه يا جميل
زعلان ليه ..قاله انا مش عاوز ابقى جميل ..انا عاوز ارجع برقوق تانى ..قاله
الجنى ..حاضر بس لازم تتعلم انك متبصش للى فى ايد غيرك لان اللى عندك
ممكن يكون احسن وانت مش عارف ..قاله انا فعلا اتعلمت الدرس يا جنى ومش
هاعمل كده تانى ..قام الجنى قاله خلاص من هنا ورايح بقيت برقوق تانى
..ورجع برقوق لعيلته وهو فرحان وسعيد ومقتنع بان القناعه والرضا باللى عنده
هيخلوه سعيد ..وتوته توته فرغت الحدوته حلوه ولا ملتوته ؟؟!!"
ألا تتفقون معي ان قصص الاطفال يكمن جمالها في بساطتها ؟
تخلق هذة القصص نوعا ما من الشجن وخاصة عندما تكتشف في كبرك أن العالم
ليس بـهذة البساطة والوضوح...العالم يا رفاق اعقد بـكثير من أن تتجوز
سندريلا من الامير لدواعي عدم تكافؤ المستوى الاجتماعي ولان أهله مش
هيرضوا وكده يعني
المهم....يا رب مهما اكتاب أو اشتكي مش عاوز أبقى "جميل" عاوز أفضل أنا
"عمر"
